Dónaleikurinn GTA:SA

Eins og flestir í tölvuleikjaheiminum og þótt víðar væri leitað vita þá komst upp um falin kynlífsatriði í Grand Theft Auto: San Andreas. Þegar þetta kom í ljós ákvað ESRB að hækka aldurstakmarkið á leiknum úr "Mature" í "Adults Only" og er leikurinn þar með kominn í hóp með annað efni sem er hið argasta klám eða verulega ógeðfelt ofbeldi.

Hér eru nokkrar ástæður fyrir því afhverju þetta er fáránlegt:

• Efnið er ekki aðgengilegt nema að "hakka" leikinn. S.s. venjulegur notandi sem kaupir leikinn og spilar hann eðlilega mun aldrei sjá neitt af þessu.
• Efnið er álíka dónalegt og þáttur af Sex and the City - það sjást engin kynfæri og þátttakendur eru nánast fullklæddir.
• Það virðist vera allt í lagi að drepa löggur og saklausa vegfarendur en um leið og sést í fjóra punkta á skjánum sem á að vera geirvarta, þá er þetta orðið klám.
• Það er til svipað hakk fyrir Sims 2 þar sem að, ólíkt GTA:SA, meira að segja kynfæri eru sýnileg, samt fær sá leikur 13 ára aldurstakmark.

Að vísu fannst mér Rockstar, sem bjuggu leikinn til, ekki höndla þetta rétt þegar upp komst um þetta. Þeir ásökuðu hakkara um þetta, og þó að það sé rétt að það þurfi að hakka leikinn til að komast að efninu, þá liggur það ljóst fyrir að efnið, þrátt fyrir að hafa verið falið, hafi komið frá þeim sjálfum. Kannski var þetta eitthvað sem var gert í gríni og átti aldrei að fara út fyrir hús, en staðreyndir málsins eru að þeir gerðu mistök og eru að fá að kenna harkalega á því.

Sudoku

Sudoku er alveg hættulega ávanabindandi leikur. Blaðið fær heiður fyrir að vera með daglega gátu til að leysa þegar maður er "offline", eins og reyndar flest öll stóru dagblöðin í útlöndum. Það er líka hægt að kaupa Sudoku bækur til að dunda sér við - fínt í ferðalög og svoleiðis.