Ég horfði á dagskrálið

Það gerðist sá merkisatburður á laugardagskvöldið að ég og Íris settumst fyrir framan sjónvarpið og horfðum á bíómyndina Something's Gotta Give. Fín ræma og allt það, en mér fannst þetta voðalega furðuleg upplifun. Það tók mig smá stund að átta mig á því hvað það var en svo fattaði ég það. Við vorum að horfa á kvöld-dagskrálið í sjónvarpinu í beinni.

Venjulega erum við of upptekin við að sjá um að gefa börnunum að borða og svo að hátta þau að við hreinlega missum af "prime time" sjónvarpi. Ef það er eitthvað merkilegt þá tökum við það upp og horfum á seinna. Af einhverri ástæðu vorum við óvenju fljót að koma börnunum upp í rúm á laugardaginn og því gafst tækifæri á að upplifa þennan atburð í fyrsta skipti í mörg ár.